[东方报]非國盃：摩洛哥球星陣誓破南非[01-30]

十七号

非國盃16強，爭標分子摩洛哥對南非，摩洛哥喺F組2勝1和得7分首名出線，入5球僅失1球，表現出色，薛耶治、阿舒拉夫分組賽都有士哥，為淘汰賽打好基礎，南非喺分組賽輸畀馬里，好打有限，加上摩洛哥近6場5勝1和，主勝看高一線。（Now 639周三凌晨4時直播）

貴為前年世盃4強隊伍，世界排名13位嘅摩洛哥，係今屆非國盃排名最高球隊，比第2位塞內加爾高7位，踢得好係應該，佢哋分組賽第2輪被剛果民主共和國逼和1比1，可以話係一個警號，而另一爭標分子埃及16強出局，更會令到摩洛哥球員收起輕敵心態，全力應付南非。

薛耶治阿舒拉夫孭飛攻力勁
摩洛哥攻力強勁，兩大主力薛耶治同阿舒拉夫，今屆都交出1入球1助攻，西維爾射手安尼斯利同利華古遜小將阿邁艾里分組賽都已開齋，佢哋都係球隊爭勝本錢，防守方面表現亦對辦，3場分組賽有兩場保持不失球，今場絕對有力零封對手。

另邊廂，南非近年外流歐洲球員幾近絕迹，效力般尼嘅利尼科士打都未獲徵召，大部分都係本土球員，喺E組1勝1和1負得4分，力壓同分嘅納米比亞次名出線，佢哋實力遠遠不及摩洛哥，今場只能被動防守，輸波只係遲早問題，爆冷機會好微。