[东方报]歐冠：魔人弗爆曼城做大事[10-01]

十七号

歐聯入球大戰，法甲球隊摩納哥主場迎戰今季逐漸回勇嘅英超勁旅曼城。摩納哥歐聯首輪竟以1比4大敗喺實力一般嘅布魯日腳下，今場要發力搶分補數，佢哋踢法屬於全攻型，近5場4次開4球或以上，遇上攻力超強嘅曼城，勢必合演入球騷，3.5球入球大咪錯過。（Now 638周四凌晨3時直播）

「藍月亮」曼城捱過上季低潮期，今季正在復甦當中，尤其夏季轉會窗關閉前簽入意大利鋼門基安盧基當拿隆馬，防線易失波問題顯著改善，中前場球員可以放膽搶攻，近5場錄得4勝1和，包括歐聯首輪2比0輕取拿玻里，近6場全部先入波，展現強勢。

講到曼城前線表現最出色球員，當然係「魔人」艾寧夏蘭特。該位挪威射手今季各項賽事攻入9球1助攻，近期連續5場有「士哥」，對住重攻輕守嘅摩納哥，又係佢爭取入球好機會，所以捧入球大之餘，曼城「第一隊入球」同埋艾寧夏蘭特「首名入球」都可以兼顧。

摩納哥有力駁火
摩納哥法甲開季成績其實唔曳，頭5場獲4勝，不過上輪聯賽1比3不敵羅連安特之後退居第4位，佢哋最值得留意係巴塞隆拿借將安素法迪，雖然上陣時間唔多，但3次上陣攻入4球，曼城防線未必守得佢住，3.5球入球大好易夠數。