[东方报]歐冠：PSG訪巴塞讓客添食[10-01]

十七号

安歷基倒戈諗定計破敵
歐聯重頭戲上演「雙巴大戰」，巴塞隆拿主場火併巴黎聖日耳門（PSG），「地上最強」爆傷兵潮，鋒線主力拉芬夏比洛尼同門將祖安加西亞近日加入「十字兵」，同埋經歷「地獄賽程」，體力難免比較輸蝕。上屆冠軍PSG由巴塞名宿安歷基執教，熟悉對手路數，加上呢支法甲王者跨屆近7場歐聯贏6場，有得受讓，必捧讓球客勝（+1）。（Now 643周四凌晨3時直播）

巴塞隆拿上周五凌晨西甲擊敗奧維多一役，翼鋒拉芬夏比洛尼勇戰受傷，呢位巴西國腳上季踢57場入34球，今季7次披甲亦有3球進帳及2次助攻，佢缺陣之下，嚴重削弱球隊攻力。雖然「新世代球王」拉明耶馬上場聯賽傷愈復出，但畢竟休息一段時間，能否恢復十足狀態，實屬疑問，加上兩名中場加維同費明盧比斯養傷，令中前場人腳日趨緊張。至於拉舒福特近期表現不俗，但佢一向水準飄忽，實在信唔過。

「地上最強」殘陣讓唔起
此外，門將祖安加西亞受傷長抖，由久疏戰陣嘅35歲老將施捷斯尼把關，亦係一大隱憂。值得留意，巴塞先後於上周五及周一凌晨，連續踢完兩場西甲，然後匆匆再鬥PSG，賽程非常緊密，球員體力隨時後勁不繼。

另邊廂，巴黎聖日耳門上場法甲輕取歐塞爾2比0，上輪歐聯亦贈阿特蘭大4蛋，各項賽事近7場贏6場，即使金球獎得主奧士文尼迪比利近期受傷缺陣，對球隊並冇造成太大負面影響。事實上，PSG鋒線人腳充裕，干卡路拉莫斯、巴特利巴高拿、基華拉斯基利亞都係獨當一面嘅進攻猛將。翻查雙方近4次對賽，PSG取得2勝1和1負，無獨有偶兩場勝仗都係作客贏4比1，包括上年4月由安歷基領軍，呢位西班牙名帥重返成名地，相信早有破敵策略，PSG受讓抵玩。