[东方报]歐霸：羅馬食住上主W明醒里[10-02]

十七号

另一場歐霸焦點戰，意甲「雌狼」羅馬主場硬撼法甲勁旅里爾。羅馬今季喺加斯柏連尼帶領下，愈戰愈勇，遇上開始跌Watt嘅里爾，有力乘勝追擊，主勝有計。（Now 643周五凌晨零時45分直播）

喺阿特蘭大一言九鼎嘅教父級主帥加斯柏連尼，今季決定轉教羅馬卻被輿論睇淡，一來「雌狼」內部成日立立亂，二來加帥以前執教國米失敗嘅經驗，被視為唔適合成為大球會嘅教頭，但勢估唔到佢立即交到貨，開咧後各項賽事踢咗6場，羅馬豪取5勝1負，包括喺意甲首都打吡勇挫死敵拉素，而喺首輪歐霸亦擊敗另一支法甲兵尼斯，絕對唔赦里爾。

里爾靠老將基奧特孭飛
里爾開咧前令人意外地簽入前法國國腳基奧特，由於佢之前喺美職都冇料到，事隔10多載重返法甲亦不被睇好，點知佢連番建奇功，包括首輪歐霸對白蘭恩一錘定音，以38歲零360日成為歐霸史上最大年齡後備上陣入波球員，但畢竟佢都有番咁上下年紀，好難場場有貨交。里爾各項賽事近3場兩度落敗，開始跌Watt，加上羅馬一向靠主場食胡，近5次歐霸主場出擊全勝，再贏唔奇。