[东方报]英超：熱刺衝前4上盤胸有城竹[05-01]

august

今晚英超頭場之一，熱刺主場鬥李斯特城。熱刺近期連場失分，為打入前4拎下屆歐聯入場券不容再失，咁啱撞正有歐協聯後顧嘅「狐狸」，絕對係贏波反彈好時機，讓1/1.5球擺明有信心，照捧上盤。

早前殺上第4嘅熱刺，近兩場聯賽突然跌Watt，接連輸畀白禮頓及悶和賓福特，兼且全部食白果，依家跌番落第5位，落後4哥阿仙奴2分，爭入前4又陷於被動。由於佢哋未來兩仗要硬撼利物浦同阿仙奴，為免分數上被拋離，今仗再冇失分空間，一定要搏盡擸晒3分。

李斯特城重心喺歐協聯
李斯特城目前位處聯賽榜中游，冇嘢好爭，依家已經將目標放晒喺歐協聯，希望捧盃兼取得下屆歐霸盃資格。佢哋上周中歐協聯4強首回合主場同羅馬踢和1比1，嚟緊周中次回合要造訪意大利再鍊過，勝負難料，論重要性高過今仗好多，留力唔奇。翻查紀錄，熱刺近4次同「狐狸」交手取得3勝1負，當中王牌哈利卡尼轟入4球，首循環就憑貝雲積於補時階段梅開二度，奇迹反勝3比2，明顯格食格，上盤值得捧場。