[东方报]英超：狀態低沉谷唔起 車仔曼聯半和啱胃口[04-18]

十七号

英超「搶5」重頭戲，車路士主場迎戰曼聯。「車仔」上輪聯賽淨吞曼城3蛋，全失3分後跌出前5嘅歐聯資格區域，今場同主要競爭對手曼聯交鋒，不容再失；「紅魔」休戰3周後狀態反而下滑，今場「6分波」受考驗，加上曼聯近5場作客全開半場和，不妨再追。（Now 621及611周日凌晨3時直播）

車路士近況慘不忍睹，除咗英足盃贏低組別嘅維爾港之外，近6場輸咗5場，歐聯大敗出局，聯賽亦3連敗共吞7蛋，再數上去，原來佢哋對上一場聯賽主場贏波，要數到2月初贏韋斯咸，咁嘅表現實在難以交代。

車路士當務之急，係諗辦法取得來季歐聯入場券，不過「車仔」依家個勢咁弱，相信今場會先穩住後防，再伺機進攻方為上策。

至於曼聯近期表現亦回落，近4場聯賽僅1勝，上輪主場「玫瑰打吡」竟不敵列斯聯，好在依家仲排緊第3，今場作客史丹福橋球場只要頂住唔輸，相信捱到季尾就可安全上岸重返歐聯。

主力缺陣更要小心
車路士近期並無傷兵，但中場主力安素費南迪斯因紀律原因繼續內部停賽，無形中益咗曼聯；至於「紅魔鬼」後防問題比較嚴重，利辛度馬天尼斯同哈利馬古尼雙雙停賽，馬菲斯迪歷特仲養緊傷，焗用約羅同艾登希雲兩位年輕中堅，防線危危乎，預計卡斯米路、勞基梳爾同達洛治都會盡量留守後場，唔會輕易出擊。今戰雙方喺唔想輸之下，好可能又係悶戰一場，半場和好易捱到。