[东方报]國友賽：哥倫比亞夠鑊氣大盤炒旦[06-07]

十七号

兩支世盃參賽球隊喺熱身賽碰頭，南美勁旅哥倫比亞喺美國中立場對世盃「初哥」約旦，呢場波睇落強弱懸殊，哥倫比亞實力同經驗都贏晒，但考慮到約旦球員初戰世盃，心情興奮打高兩皮波，預計入球唔會少，加上哥倫比亞近5場全開3球或以上，約旦近4場更全開4球或以上，2.5球入球大超筍。（周一早上7時開賽）

哥倫比亞之前喺主場踢咗場熱身賽，以3比1擊敗無緣世盃嘅哥斯達黎加，達雲臣山齊士、路易斯迪亞斯同路爾斯蘇亞雷斯都有「士哥」，球隊嚟到美國備戰，踢完今場就會飛去墨西哥，準備世盃首仗對烏茲別克，今場同約旦「拍跳」，其實就係對烏茲別克嘅預演，最後檢閱之餘，仲會測試西亞球隊嘅踢法特點，今場重要性可想而知。

約旦勝在死纏爛打
約旦1986年開始參加世盃外圍賽，等待40年終於第一次出席決賽周，效力雷恩嘅艾達馬利係全隊唯一一個喺歐洲5大聯賽搵食球員，全隊名氣同哥倫比亞冇得比，不過呢隊波勝在爛打，例如去年底阿拉伯盃決賽惡鬥上屆世盃4強勁旅摩洛哥，戰至加時先輸2比3，實際戰鬥力唔係表面咁差，同哥倫比亞鬥攻絕對唔出奇，大家等睇入球騷。