[东方报]世界盃：火力有保證！伊朗強攻新西蘭[06-15]

十七号

世盃分組賽G組首輪，伊朗喺洛杉磯鬥新西蘭。幾支亞洲球隊喺今屆有好表現，作為老牌勁旅，當然唔會失禮，伊朗連續4屆殺入決賽周，應付大場面經驗豐富；新西蘭攻弱守強，主要靠高空波偷襲，相信難阻伊朗全取3分，推介主勝。（Now 618及616周二早上9時直播）

泰尼米全力數胡
講實力同經驗，作為亞洲老牌勁旅嘅伊朗毫無疑問高幾班，佢哋喺外圍賽16場只輸過1場，前線火力有保證。雖然今次因為簽證問題，球隊要先去墨西哥集訓，更有傳大軍要即日來回去美國踢波，但領隊加利內伊指，最終安排可提早一日抵埗，對備戰功夫好有幫助。

伊朗踢法好有紀律性，而且防線穩固，前面有效力奧林比亞高斯嘅泰尼米壓陣，呢名33歲前鋒為國家隊上陣105次射入60球，面對實力有段距離嘅新西蘭，應該可以搵到數胡機會。

新西蘭喺大洋洲區5戰全勝出線，但含金量有限，陣中缺乏頂級球星，預計今場會泊大巴死守，踢法非常被動，球隊主要依賴諾定咸森林嘅基斯活特衝鋒陷陣。唔少球迷以為，新西蘭球員身材高大，將會轟炸伊朗；但根據統計，原來新西蘭球員平均高度係183.5厘米，比伊朗嘅183.7厘米仲要矮。睇埋雙方世盃最後備戰，伊朗3連勝、新西蘭兩連敗，不論實力、近況同士氣，伊朗望落都高啲，今場簡單捧主勝。