[东方报]世界盃：金球戰友世盃交鋒 葡萄牙Vs克羅地亞[07-02]

十七号

世盃32強矚目大戰，葡萄牙同克羅地亞兩支歐洲勁旅鬥法，亦係兩位金球獎得主「皇馬舊生會」聚會。葡萄牙喺分組賽表現一般，王牌球星C朗仍未發揮出最大威力；同樣講求個人技術嘅克羅地亞，表現平穩但冇乜驚喜，兩支「技術流」球隊硬碰，質素更高嘅葡萄牙可以食住克羅地亞，加上今日係迪亞高祖達意外離世一周年，一眾葡軍必為好兄弟搏盡，主勝可捧。（Now 618及616周五早上7時直播）

今屆好大可能係C朗同莫迪歷，兩位前金球獎得主「世盃最後一舞」，而隨住今場結束，更加會成為其中一人嘅國家隊世盃告別戰，對二人、葡萄牙及克羅地亞國家隊，以至整個世界球壇，都會係一個重要時刻。

技術流互片啱晒葡軍
葡萄牙喺分組賽1勝2和，對住剛果民主共和國同哥倫比亞都只能打和，兩場失分都係對手用氣力同葡萄牙鬥搶，令葡萄牙難以組織，老將C朗就連掂波嘅機會都唔多。不過葡萄牙勝在防守堅挺，近2場都冇失波，只要前面嘅高質前鋒把握到一次機會，就有把握可以贏波，以質取勝。

C朗同般奴費南迪斯等核心都年過三十，從來唔係擅於前場逼搶嘅球員，不過今場對手克羅地亞都有唔少老將，一樣係偏重技術同戰術，多過用體力化嘅高強度爭搶，莫迪歷、比列錫、高華錫等都係着重控球在腳，預料比賽節奏唔會推得太快，啱晒葡萄牙球員發揮。

PSG中場孖寶速率取勝
既然踢法相似，「貨比貨」之下，葡萄牙顯然技高一籌，葡萄牙PSG中場孖寶域天拿同祖奧尼維斯嘅速率，絕對可以壓制「格仔兵」莫迪歷同高華錫等中場。睇番兩隊近4次正式賽事交手，葡萄牙有3勝1和成績，4場賽事合攻轟入克羅地亞10球，「格食格」味道甚濃。除咗實力之外，今仗於香港時間7月3日開波，呢日正正係上年因車禍喪生嘅葡萄牙球星迪亞高祖達死忌，大家更有額外動力為祖達而戰，「格仔兵」凶多吉少。