[东方报]英超：阿仙奴大盤啱森水[09-13]

十七号

主場特醒火力猛
今晚英超早場兼重頭戲，阿仙奴對諾定咸森林。阿仙奴開季2勝1負，特別喺主場踢高一皮波，上次主場就以5比0大炒列斯聯，攻力有保證；森林幾日前換帥，會唔會有「換帥效應」實屬未知之數，不過翻查紀錄，「兵工廠」近4次主場對森林全開3球或以上，預計入球必多，2.5球入球大放心捧。（Now 621及611周六晚7時30分直播）

阿仙奴上場聯賽0比1輸畀爭標勁敵利物浦腳下，暫時以6分排第3，當務之急係重拾鬥志，主場迎戰諾定咸森林呢類中型班，定必以3分為目標，不過球隊開季都幾黑仔，聯賽頭3場不停有主力受傷，馬田奧迪加特、布卡約沙卡、威廉沙列巴都有不同程度傷勢，上陣成疑，捧場客要小心。

唯一慶幸嘅係，國際賽檔期阿仙奴一眾主力冇穿冇爛「零損傷」，據說呢個情況近年罕見；而且呢班踢「太公波」球員表現出色，米基爾馬連奴喺西班牙作客土耳其一戰連中三元，馬度基同迪格蘭賴斯為英格蘭上陣亦有「士哥」，返到聯賽將可維持火力。

森林易帥重攻輕守
開季3戰得4分嘅森林最近「大地震」，班主馬連拿基斯本周初突然辭退主帥紐奴，臨時邀請前熱刺教頭普斯迪高路接手，將帥之間肯定需要時間磨合，不過根據「澳普」近2季執教熱刺戰績所見，其戰術重攻輕守極豐娛樂性，若然今場同阿仙奴鬥攻，肯定大把波入。