[东方报]英超：曼聯穩陣波半和好路[09-20]

十七号

艾摩廉為保飯碗唔衰得
英超上演「紅藍大戰」！今季全面重組嘅曼聯，頭4輪聯賽只得4分，寫下球會33年最差開季成績，全隊上下受口誅筆伐，今場奧脫福出擊不容再失，球員背負沉重壓力下，踢法肯定先求穩陣。車路士周中踢完歐聯惡戰，疲兵出戰亦未必谷得起，半場和玩得過。（Now 621及611周日凌晨零時30分直播）

曼聯上場慘吞曼城3蛋，領隊魯賓艾摩廉被傳帥位不穩，今場硬撼車路士唔輸都收貨，尤其馬菲奧斯根夏同美臣蒙特兩位創造型球員都受傷，般奴費南迪斯又被安排踢唔擅長嘅墮後中場位置，球隊前場創造力極弱，單靠麥比奧莫衝鋒惡唔出樣，入波能力畀唔到人信心。

車路士疲兵頂硬上
車路士周中喺歐聯同拜仁慕尼黑激戰輸1比3，高爾彭馬、摩西斯卡些度及祖奧柏度等踢足全場，一眾主力消耗甚大，但「車仔」關鍵位置替補球員，能力同正選都有明顯差距，上場聯賽對賓福特留力即刻失分，預料眾主力今場都要頂硬上，為免體力虛耗會減慢節奏，上半場先靜觀其變。

曼聯有心理壓力、車路士體能輸蝕，今場各有隱憂下都會踢得穩陣，抖足一星期嘅「紅魔鬼」亦會期望等到下半場，憑體能優勢搵着數。睇番曼聯近年對車路士都踢到難分難解，近10次交手有9次半場平分秋色，今場再追半場和好路。