[东方报]英超：曼城勒唔住半Ｗ嗒糖[10-18]

十七号

今季表現回勇嘅曼城，將會喺英超主場迎戰愛華頓。「藍月亮」近7場賽事5勝2和，演出非常穩定，最大原因係挪威神鋒艾寧夏蘭特狀態巔峰，呢位「世一」射手已連續10場比賽入波，愛華頓防線頂佢唔住，博曼城開半場主勝好路。（Now 621周六晚10時直播）

「藍月亮」今季改變踢法，進攻變得更簡單直接，充分利用夏蘭特嘅速度同爆破力，目前冇乜球隊可以抵擋，佢喺曼城同國家隊已連續10場上陣入波，近5場更有4場喺上半場攻陷對方大門，令球隊處於有利局面。

曼城有菲爾科頓、謝利美杜古、雷恩達斯等創造高手，為艾寧夏蘭特提供源源不絕嘅彈藥，領隊哥迪奧拿喺戰術上亦作出配合，喺比賽早段積極搶攻，「藍月亮」近5場賽事，就有4場順利喺上半場領先。

借將基亞利殊未能倒戈
今季成為愛華頓核心嘅基亞利殊，因為外借條例未能倒戈上陣，令「拖肥糖」嘅反擊實力大打折扣，加上愛華頓近3場作客都被對手攻入2球，疲弱防守力恐怕難阻曼城進襲，半場主勝放心捧場。