[东方报]英超：地頭出擊遇着私房菜 曼城半W例不虛發[11-29]

十七号

聯賽同歐聯2連敗嘅曼城，今晚主場出擊迎戰列斯聯，「藍月亮」本來走勢唔錯，但近兩場突然走樣，需要一場勝仗止瀉，今場係好機會，皆因佢哋近4次對列斯聯全勝，而且全部半場領先，今場遇上「私房菜」直頭當練靶咁射，「藍月亮」該可贏波反彈，不過主勝熱到無味，半場主勝更可取。（Now 621及611周六晚11時直播）

曼城自從簽入意大利鋼門基安盧基當拿隆馬，防線回復穩陣後，9月至11月初14戰錄得11勝2和僅1敗佳績，鋒霸艾寧夏蘭特亦連場有入球進帳，一度追至落後榜首阿仙奴4分，上輪聯賽作客輸畀紐卡素可能純屬意外，但上仗歐聯再喺輕敵出副選下淨吞利華古遜兩蛋，情況就唔太理想，事關突然連輸兩場絕非好事，如果再輸落去，就會好似利物浦咁，輸輸吓成隊散晒。

列斯聯冇態３連敗
睇番曼城陣容其實冇乜唔妥，只有洛迪卡斯簡迪同高華錫兩名傷兵，艾寧夏蘭特、貝拿度施華、謝利美杜古等主力都在陣，今場可以強陣出擊，最重要係今場對手係列斯聯，翻查兩隊交手紀錄，曼城近4次交手全勝，試過大炒7比0，所以今場大有可能搵列斯聯一吐烏氣。

列斯聯升班後實力未見提升，開季至今一直徘徊榜下游位置，近期成績更直線下降，近6場輸5場，包括近3場全敗共失8球，今場作客曼城注定畀人當靶咁射，預計上半場都頂唔住，半場主勝有計。