[东方报]意甲：狀態大勇唔赦雌狼 科木讓客捧得過[12-15]

十七号

今晚意甲大戰，「4哥」羅馬主場硬撼科木，亦係「老薑」加斯柏連尼與少帥法比加斯正面對決。加帥過於保守風格，令羅馬近況持續下滑，相反「法比仔」麾下嘅科木初生之犢不畏虎，近13場僅1敗，無懼挑戰「雌狼」，科木「讓球主客和」有得受讓，讓球客勝（+1）咪錯過。（Now 638周二凌晨3時45分直播）

加斯柏連尼近年喺阿特蘭大，以崇尚進攻嘅打法取得成功，令佢以67歲之齡再次獲得執教大球會機會，不過今季入主羅馬後竟一反常態，愈踢愈保守，14輪聯賽過後僅失8粒，防守係幾穩陣，不過只入15球，失去以往執教「女神」阿特蘭大時有前冇後嘅風格。單計近5輪聯賽，羅馬錄得2勝3負，入得5粒咁大把，贏就贏得忟水，輸嗰陣表現窩囊，好似上輪鬥護級分子卡利亞里輸0比1之餘，仲有翼衞薛基施歷被逐，賠了夫人又折兵。

新星尼高柏斯有料到
相反，科木喺少帥法比加斯帶領下充滿朝氣，雖然上輪慘吞國際米蘭4蛋，但只係佢哋近13場以來首度輸波，其餘為6勝6和。呢位38歲前阿仙奴中場以往深受恩師雲格熏陶，明言拒絕「泊大巴」打法，14輪聯賽入19球及失11球，依家位處上游，而且佢同樣重用年輕球員，打起咗尼高柏斯、積登艾戴、捷西斯洛迪古斯等新星，其中尼高柏斯今季已入5粒兼交出5個助攻，不容小覷，雖然今場要作客，但亦無懼畏首畏尾嘅羅馬，有力搶分而回，加上仲有得受讓咁筍，讓球客勝（+1）捧得過。