[东方报]英超：前鋒冇貨交難炒狼隊 藍月亮半場細有計[01-23]

十七号

周六晚英超賽事，目前排第2位嘅爭標分子曼城，喺主場迎戰包尾大幡狼隊，睇牌面係強弱懸殊。不過「藍月亮」近期狀態同士氣都麻麻，王牌前鋒艾寧夏蘭特忽然「死火」，對住突然上力嘅狼隊未必可以予取予攜，尤其曼城上半場例「歎慢板」，今場博1.5球半場細為妙。（Now 621周六晚11時直播）

曼城上星期喺「曼市打吡」被曼聯技術性擊倒，周中歐聯又作客輸畀波杜基林特，直接出線資格危危乎。「藍月亮」嘅戰績下滑，同射手艾寧夏蘭特「死火」有莫大關係，呢位挪威神鋒最近8場比賽只入過1球，卓基、謝利美杜古、菲爾科頓等攻擊手表現唔係太穩定，入球能力大受削弱。

做好防守再諗進攻
曼城近期後防傷兵眾多，加華度爾、魯賓戴亞斯受傷影響甚大，領隊哥迪奧拿只好改變策略，先鞏固防務再諗進攻。今場雖然有新中堅馬克古希加盟，但初來甫到適應需時，加上球隊下周中有歐聯後顧之憂，相信「藍月亮」唔會改變穩陣風格，而且佢哋近5場聯賽，半場總入球全開1球或以下，值得再追。

狼隊開季戰績衰到破晒紀錄，不過近期出現反彈，連續4場聯賽搶分成功，拎到1勝3和成績，包括作客打和曼聯，以及上輪0比0悶和紐卡素。狼隊今場作客會全力死守，乘住近期勇態兼好氣好力，上半場有力抵抗曼城進襲，一於捧半場細。