[东方报]英超：紐卡素飄忽讓唔起維拉[01-25]

十七号

英超10點場免費直播紐卡素對阿士東維拉，「喜鵲」短期目標係歐聯直接出線16強，下場火併巴黎聖日耳門踢生死戰，今場聯賽難免有保留，維拉歐霸盃已經提前出線，並無後顧之憂，而且佢哋各項賽事近9場作客僅輸1仗，今場受讓半球、一球，下盤超筍。（ViuTV 96台周日晚10時直播）

爭歐聯前8喜鵲要取捨
紐卡素表現飄忽，聯賽同英聯盃兩條戰線都唔多順，好在上場歐聯翻生，主場大炒燕豪芬3比0，依家揸住13分有機會殺入前8，但下場對手係衞冕嘅巴黎聖日耳門，主帥艾迪侯域有需要作出取捨。

不過就算「喜鵲」今場決定全力搏殺，都未必贏得到阿士東維拉，因為翼鋒安東尼哥頓有個奇怪數據，佢喺歐聯7場入6球，但返到聯賽就死火，17場入得2球，聯賽首席射手般奴古馬雷斯有傷在身，焗用小將路易斯邁利，今場莫講話贏，唔輸都還神。

另邊廂，維拉上場聯賽意外輸畀愛華頓，幸好前列各隊都相繼失分，所以形勢不變，佢哋仍然排第3，至於歐霸盃更加醒神，已經提前鎖定直入16強席位，下場對薩爾斯堡只係例行公事，今場聯賽可以去盡，睇佢哋今場排陣，奧尼屈堅斯、摩根羅渣士喺齊度，加上球隊無懼作客，今場贏埋都唔奇，受讓更加抵玩。