[东方报]歐冠：隨時計得失球曼城搶半大[01-28]

十七号

歐聯聯賽階段煞科重頭戲，曼城主場惡鬥加拉塔沙雷。爭冠熱門「藍月亮」目前排11位，要爭前8名直接出線，今場唔單止要贏波，仲要爭取大勝嚟提升得失球差；加拉塔沙雷同樣要搶分保住附加賽資格，今場唔會死守坐以待斃，預料戰況相當激烈，1.5球半場大值得一博。（Now 645周四凌晨4時直播）

曼城上輪意外1比3輸畀波杜基林特，令直接出線目標變得非常被動，依家同「藍月亮」一樣有13分嘅球隊多達8隊，意味如果多支球隊同時贏波，就要計得失球差分勝負。曼城依家得失球差只係+4，喺8支同分球隊之中僅排第6，所以今場有好大動力去爭取入球，相信會由頭攻到尾。

曼城喺防線傷兵滿營下，近期比賽都偏向穩陣，不過今場已經無退路，一定盡地一煲搶攻。艾寧夏蘭特上場聯賽休息叉電，今場隨時猛虎出柙，加上馬莫殊踢完非國盃歸隊即刻有波入，以「藍月亮」前鋒嘅數胡能力，絕對有力喺上半場痛擊加拉塔沙雷防線。

加拉塔沙雷有本錢駁火
加拉塔沙雷連續3輪失分後，依家排緊喺第17位，仍有機會跌出前24名，今場絕對唔可以掉以輕心。呢支土超勁旅擁有域陀奧森漢、利萊辛尼、莫路伊卡迪等星級攻擊球員，夠晒本錢同曼城展開駁火，今場生死戰會毫無保留鬥攻。曼城近6場歐聯，有5次半場開2球或以上，1.5球半場大有計！