[东方报]法甲：PSG露疲態半和起賽[02-08]

十七号

今晚法甲壓軸大戰，榜首巴黎聖日耳門（PSG）主場硬撼馬賽。PSG近期明顯有疲態，尤其初段總係谷唔起；馬賽要贏波先可重燃爭標希望，唔會輕舉妄動，半場和捧得過。（Now 639周一凌晨3時45分直播）

馬賽落後太多唔敢亂嚟
PSG上年榮膺6冠王，但賽程咁密難免出現疲態，王牌奧士文尼迪比利、迪斯亞杜伊雖然傷愈但未托弗，夏基美等人之前出戰非國盃，仲有基華拉斯基利亞及法比安彭拿因傷倦勤，主帥安歷基亦焗住起用新仔，難怪佢哋近7仗，法定時間只獲3勝2和2負，唔單止法足盃畀同市球隊巴黎FC爆冷踢出局，歐聯亦搞到要跌落附加賽，近4仗全開半場和，初段谷唔起嘅問題表露無遺。

之前喺歐聯出局嘅馬賽近況亦一般，現時聯賽落後PSG足足9分，想爭冠今仗一定要贏，不過佢哋近年交手輸多贏少，之前7次碰頭法定時間輸咗5次，就算主帥迪薩比點樣崇尚進攻，今晚都要先求穩陣，易邊後再諗辦法，半場和可取。