[东方报]英足盃：車仔專炒弱旅上盤抵捧[02-13]

十七号

今晚英足盃第4圈焦點戰，8屆盟主車路士作客「老虎仔」侯城。車路士雖然今仗應該會大輪換，但副選如利安戴納、比諾傑坦斯等難得擔正，一定搏盡，而且佢哋對親低組別球隊例唔留手，讓球盤讓1/1.5球都照撐。（Now 651周六凌晨3時45分直播）

自從羅仙尼亞年頭接手後，車路士大踢性感足球，入得又失得，好睇就好睇，不過就搞到喺英聯盃4強畀阿仙奴淘汰，聯賽爭冠機會亦相當渺茫，今季奪冠目標剩番歐聯同英足盃，所以就算今場鬥弱隊，好大機會作出輪換，但絕對唔會hea踢。何況「車仔」一班副選如利安戴納、比諾傑坦斯、馬克基奧，質素唔失禮，仲有唔算絕對主力嘅阿歷真度加拿祖，對住侯城夠殺有餘喇。

英冠仔侯城踢盃賽吃力
另邊廂，侯城只係英冠前列分子，上圈英足盃對住同組嘅布力般流浪，都要鬥到互射12碼先晉級，遇上英超勁旅車仔，邊有得打呀。翻查紀錄，「車仔」近年英足盃對住非英超球隊，毫無憐憫之心，包括上圈作客狂數查爾頓五個一皮，呢場正正係羅Sir上任後首場領軍賽事，明顯係搵弱隊祭旗立威，今仗隨時照辦煮碗，大勝可期。