[东方报]歐冠：阿仙奴主將抖夠搶半Ｗ[03-11]

十七号

歐聯16強首回合，另一支英超勁旅阿仙奴將會作客利華古遜，「兵工廠」今屆演出堪稱無懈可擊，成為「聯賽階段」唯一8戰全勝球隊，並且往往先下手為強，近5場歐聯有4次上半場領先，德甲球隊利華實力平庸，恐怕無力招架，一於直取半場客勝。（Now 643周四凌晨1時45分直播）

阿仙奴今季4線作戰，成績同樣出色，包括已打入英聯盃決賽、英足盃8強，排英超榜首，並以全勝姿態晉級歐聯16強，可見水準非常穩定。適逢上周末英超休戰，讓路畀英足盃，阿仙奴以副選對甲組仔曼斯菲，令一眾主將養精蓄銳，今仗強陣出擊，預料一開波就會搶攻，爭取先入波提升勝算。

利華傷鋒頂唔住
至於利華古遜僅排德甲第6位，歐聯「聯賽階段」8戰只有3勝3和2負，靠踢附加賽淘汰奧林比亞高斯，獲得16強席位，實力唔可以同「兵工廠」相提並論。此外，利華主力射手柏德列舒希克早前受傷，已缺陣2場德甲，估計今仗仍難以披甲。呢位捷克國腳今季上陣31場入13球，包括歐聯有4球進帳及1次助攻，如果佢倦勤，利華古遜更加冇爆冷本錢。

事實上，強如德甲榜首拜仁慕尼黑，今屆歐聯都曾經以1比3敗於阿仙奴腳下，利華古遜好可能上半場就抵擋唔住「兵工廠」強攻，半場客勝玩得過。