[东方报]世盃歐洲：約基利斯翻生瑞典主W蘭唔住[03-31]

十七号

世盃附加賽B組決賽，瑞典主場同波蘭爭奪決賽周資格，如果睇外圍賽表現，波蘭肯定秤高一線，不過瑞典喺新帥樸達重建後，關鍵時刻重新振作，射手約基利斯亦翻生，前景光明；相反波蘭近期防守出現漏洞，作客未必頂得住瑞典火力，今場一於直取主勝。（周三凌晨2時45分開賽）

瑞典喺世盃外6場不勝，阿歷山大伊沙克、古路施夫斯基等主力長期受傷，可以踢附加賽係靠歐國聯排名。不過，瑞典自上年10月請到英格蘭名帥樸達執教，表現開始回復起色，上場3比1擊敗烏克蘭夠晒說服力，以約基利斯為重點嘅進攻簡單有效，呢位阿仙奴前鋒亦有3個入球回應，依家信心爆棚。

波蘭仍靠37歲「羅拔佬」
波蘭喺外圍賽僅次於荷蘭次名出線，但係整體表現唔係太突出，仍然靠37歲老將羅拔利雲度夫斯基單天保至尊，上場對阿爾巴尼亞，半場落後下靠「羅拔佬」入波驚險反勝，但係後防唔集中問題仍未解決，佢哋之前對馬爾他都失2球，防守漏洞相當明顯。

瑞典今仗有主場之利，氣勢上已經領先，何況兩隊最近5次交鋒，瑞典贏咗4次，有「格食格」味道，主勝穩開。