[东方报]英超：夏蘭特回勇連勝Mode 曼城踩油冠軍路[04-12]

十七号

今晚英超尾場上演「雙藍會」，由車路士主場硬撼曼城。「車仔」近期狀態曳爆之餘，更加遇強例腳仔軟，相反「藍月亮」已啟動爭冠連勝mode，神鋒艾寧夏蘭特亦搵番對射門鞋，今仗有力反客為主，讓球盤曼城讓平半，一於捧上盤。（Now 621及611周日晚11時30分直播）

「車仔」主帥羅仙尼亞雖然年頭上任後一度戰績不俗，可惜每況愈下，各項賽事近6仗只得1勝1和4負，唯一勝仗係上場英足盃大勝英甲榜尾球隊維爾港，不值一提。

車仔遇強例腳軟
最弊係「車仔」內部立立亂，中場核心安素費南迪斯因想走人言論，遭球隊內部處分停賽2場，今仗要繼續服刑。加上車路士近期遇強例腳軟，包括歐聯16強對巴黎聖日耳門兩回合合計慘敗2比8，以及今年3鬥阿仙奴皆北，不宜高估。

曼城擺脫早前歐聯16強出局低潮，重新啟動爭冠連勝mode，先喺國際賽期前嘅英聯盃決賽勇挫阿仙奴封王，之後再於英足盃8強豪贈利物浦4蛋，神鋒艾寧夏蘭特更喺嗰場大演帽子戲法，腳風轉順，依家佢哋可專心打聯賽及英足盃，力爭做國內3冠王，戰意唔使懷疑。何況曼城近年食住「車仔」，翻查紀錄，雙方近4次正式賽事交手，「藍月亮」取得3勝1和佔上風，為爭冠必定搏甩髀，上盤捧得過。