[东方报]英超：咬實牙關撲擊韋斯咸 阿仙奴不勝無歸[05-10]

十七号

今晚英超壓軸好戲，上演「倫敦打吡」韋斯咸主場迎戰阿仙奴！榜首阿仙奴剛打入歐聯決賽，氣勢如虹，現時可專注英超爭標，只要餘下3場全勝，就可以相隔22年再嘗聯賽冠軍滋味，肯定一鼓作氣搏盡搶分衝線，護級分子韋斯咸難以招架。翻查雙方近4次交鋒，阿仙奴獲得3勝1負，客勝值得追捧。（Now 621及611周日晚11時30分直播）

阿仙奴上月曾經短暫陷入低潮，幸好已經恢復狀態，各項賽事近4仗獲得3勝1和，包括英超2連勝，以及上場歐聯4強次回合以1比0擊敗馬體會，相隔20年再入決賽，將於5月31日凌晨同巴黎聖日耳門爭冠。因此，「兵工廠」現時可以全力應付英超，誓要贏晒最後3場對韋斯咸、般尼及水晶宮。由於對手實力偏弱，阿仙奴要「過晒三關」唔難，尤其係傷兵問題已大為改善，只剩下長期養傷嘅米基爾馬連奴、祖利安添巴倦勤，今仗強陣出擊有保證。睇埋「兵工廠」近期對同屬倫敦球隊嘅富咸、車路士、熱刺都順利勝出，預料可以迅速攻破韋斯咸大門。

錘仔幫進退失據
另邊廂，韋斯咸上仗以0比3大敗於賓福特腳下，被熱刺積分上反超前，跌至第18位「降班區」，護級形勢被動；如今已別無選擇，惟有豁出去搶攻盡力求勝。不過「錘仔幫」實力唔及阿仙奴，今仗勉強同對手鬥攻，好可能得不償失，隨時輸多幾球。事實上，韋斯咸近2次英超主場對阿仙奴，分別大敗0比6及2比5，可以話係「主場不利」，恐怕難逃再輸厄運。