[东方报]世界盃：剛果體力踢法乾C朗 葡萄牙追半場和[06-17]

十七号

上年贏得歐國聯冠軍嘅葡萄牙，今屆世盃首度登場，於K組對撼剛果民主共和國。葡萄牙今場被一致睇好可旗開得勝，但要留意佢哋踢法慢熱，甚少喺上半場擊倒對手，反而倚靠強大後備力量制勝，今場對住體能強勁嘅剛果民主共和國，難以佔得先機，博半場和好路。（Now 618及616周四凌晨1時直播）

葡萄牙陣容鼎盛，由老將C朗拿度掛帥，不過呢位殿堂級球星近況一般，決賽周前踢嘅熱身賽表現走樣，明顯C朗活動能力有所下降，面對體力充沛嘅守將未必再佔甜頭；況且葡萄牙陣中有域天拿、祖奧尼維斯同般奴費南迪斯等世界頂級中場，控球能力極高，今場大可以靜觀其變，睇定先至出擊。

後備兵屢建奇功
事實上，葡萄牙勝在後備兵力強大，後備席廂嘅球員質素同正選相差唔會太大，因此葡軍往往能夠喺後半段發力，近2場熱身賽就係靠後備兵上陣建奇功贏波；葡萄牙近4場賽事，有3場都係上半場同對手平分秋色，值得注意。

剛果民主共和國相隔52年再戰世盃，最依賴正係硬朗嘅防守，佢哋喺附加賽同牙買加激戰之下，加時贏1比0出線。剛果民主共和國踢法相當體力化，上半場有力同任何對手抗衡，近5場有4次同對手半場悶和0比0，相信今場一開波就會用體力封殺C朗，半場和有計。