[东方报]世界盃：厄瓜多爾開庫 等睇入球騷[06-20]

十七号

世盃E組兩支首輪輸波球隊正面交鋒，厄瓜多爾對庫拉索，論整體實力，南美洲球隊厄瓜多爾秤先，預料會主攻求勝。中北美洲新丁庫拉索志在參與，球員冇心理包袱，踢得比較開放，上仗甚至攻入勁旅德國大門，一於再追3.5球嘅入球大。（Now 618、616及馬會指定場外投注處周日早上8時直播）

厄瓜多爾擁有身價達1億鎊（約10.4億港元）嘅車路士中場摩西斯卡些度、阿仙奴後衞軒卡派爾、巴黎聖日耳門中堅威廉柏曹等效力歐洲球會嘅猛將，上場同科特迪瓦踢成均勢，但臨完場失守被絕殺輸0比1，的確比較唔抵，球員谷埋一肚氣，今仗正好發洩喺「魚腩球隊」庫拉索身上。尤其係厄軍最後1輪對德國，更加要把握機會贏庫拉索，起碼有3分打底，到時可能仲有望爭取成為其中1支小組最佳第3名球隊出線。

庫拉索「快樂足球」放開踢
至於庫拉索實力弱，深知出線機會低，乾脆踢「快樂足球」，並冇刻意死守，結果上場以1比7大敗於德國腳下。呢支「新丁」已達到基本目標，唔使做「三零部隊」，今仗對厄軍，應會再接再厲希望再入波。事實上，庫拉索隊內有唔少球員喺荷蘭搵食，人腳質素並唔太差，參考埋佢哋近4場總入球全開4球或以上走勢，3.5球大盤相當穩陣。