[东方报]世界盃：急先鋒Vs後勁王阿根廷首入英 明之選[07-15]

十七号

世盃4強上演宿敵大戰，英格蘭同阿根廷兩大勁旅爭入決賽，兩軍過去喺決賽周對碰製造唔少經典，今場必有惡鬥。「三獅兵團」今屆以後勁凌厲見稱，踢法比較慢熱；相反阿根廷就鍾意先下手為強，早段谷一輪就收油，以踢法上分析，博阿根廷第一隊入球係明智之選。

（ViuTV 99台、Now 618及616周四凌晨3時直播）

英格蘭今屆喺德國領隊杜曹帶領下，更加講求戰術性，上半場往往踢得相對保守，容易被對手搶到先機；今屆「三獅兵團」所失嘅6球，有5球就喺上半場被攻入，包括32強對剛果民主共和國，以及8強對挪威，佢哋都係先落後情況下反敗為勝。事實上，英格蘭一眾國腳早習慣英超嘅高強度節奏，耐力同體力都優勝過對手，而且後備兵源充足，留前鬥後嘅戰術成為杜曹嘅如意算盤。

至於力爭衞冕嘅阿根廷，球員班底冇乜點變動，幾乎用番晒上屆嘅捧盃陣容，因此合作性唔需要懷疑，任何11個球員落到場都做到一撻即着，可以迅速向對手施展強攻。當然，阿根廷重點係「球王」美斯狀態巔峰，喺前鋒線可以做到一針見血效果，無論入波抑或助攻都有極高入球轉化率，令呢支南美勁旅往往可以先拔頭籌。

美斯打骰掌控節奏
無可否認，阿根廷球員平均年齡偏大，戰術上希望盡量爭取先開紀錄，再靠技術出眾嘅球員控球在腳，以保留體力；阿根廷最近13場比賽，就有12場成功先開紀錄，今屆世盃6仗亦有5場喺上半場率先入波，當中4次嚟自美斯嘅入波或者助攻。英格蘭早段不穩靠後勁搭夠，阿根廷就先搶頭啖湯再縮後，兩軍格局相當分明，識玩就梗係捧阿根廷第一隊入球啦！