[东方报]英超：主將輪換落場玩兩手 曼城打雀半細食胡[09-17]

august

今晚英聯盃繼續有第3圈賽事，英超「2哥」兼衞冕嘅曼城，主場迎戰「英冠仔」諾域治。曼城今仗或收起艾寧夏蘭特等主力，攻力打折扣，而且今季入局較慢，「金絲雀」越級挑戰必定死守，初段隨時老鼠拉龜，1.5球半場細好路。（無綫myTV SUPER周五凌晨2時30分直播）

曼城進入後哥迪奧拿時代，徒弟馬利斯卡接手，自聯賽開咧後，各項賽事豪取5連勝，總算係平穩過渡。不過，「藍月亮」處於重建階段，始終多名舊臣離隊，同好多新兵加入，仍需要時間磨合，季初幾仗面對鐵桶陣表現略為吃力，近5仗只有2次半場領先，而且半場全開1球或以下，確係慢熱。

雖然係上屆盟主，但曼城對英聯盃重視程度只屬一般，尤其係頭幾圈都係派副選居多，加上上場聯賽贏曼聯之役，大部分時間打少個，球員消耗不小未必回得切氣，「光頭佬」好大機會收起艾寧夏蘭特、安素費南迪斯等主力，攻力難免受削。

藍月撬走曼聯新希望
既然板櫈攻力不足，搵個新星返嚟就最啱；傳聞曼聯15歲新星JJ加比爾已經同曼城達成加盟共識，呢位新星更被爆拒絕參加一隊操練，並提出「即時離隊」要求，若成事實，曼聯眼白白睇住同市宿敵挖走未來希望，對「紅魔鬼」無疑係極大打擊。

諾域治龜縮守住先
另邊廂，諾域治喺英冠排緊中游，上仗聯賽激鬥米杜士堡輸3比4，同樣消耗極大。何況造訪「藍月亮」，玩搶攻等同自殺，梗係玩龜縮死守啦！預計「金絲雀」會盡量避免太早失波，睇吓有冇機會博偷雞，相信初段會處於膠着，半場唔慌多波入。