[东方报]歐國聯：列強易帥撥亂反正 荷蘭德國宿敵火併[09-24]

august

今夏世盃結束後，歐洲列強迎來一波易帥潮，荷蘭、德國、葡萄牙等失意勁旅齊齊換帥，力圖帶來新氣象，今周踏入世盃後首個國際賽期，「高級熱身賽」歐國聯絕對係最佳試金石，睇吓佢哋能否撥亂反正！

荷蘭德國宿敵大火併
今晚歐國聯A2組首輪即爆發宿敵對決，由荷蘭主場火併德國。兩支今夏世盃32強就出局嘅勁旅先後易帥，少壯派沙維接手「橙軍」揚言要重拾全能足球風格，經驗豐富嘅高普則希望用激情重燃德國久違嘅戰意，兩大新帥都想攞頭彩，加上仇人見面分外眼紅，3.5球大盤咪錯過。（周五凌晨2時45分開賽）

與以往國際賽期多數踢2場唔同，歐國聯各隊要喺今次國際賽期一口氣連踢4場，點樣留放或調整，確係一大學問。荷蘭之前尋帥幾經波折，無論係坦哈格、施洛定尹戈爾統統Say No，最終委任前巴塞教頭沙維，由於巴塞受已故荷蘭球王告魯夫嘅全能足球影響甚深，沙維上任後亦揚言要讓球隊重拾進攻打法，有唐耶爾馬倫、加普等攻擊手助陣，唔愁攻力。不過「橙軍」近4仗場場有失波，其中3次開4球或以上，如果沙維再採用高位逼搶打法，會令中堅華基爾雲迪積克回防速度較慢嘅問題加倍放大。

着90年復刻綠衫振士氣
另邊廂，德國邀得名帥高普出山，呢名前利物浦教練非常破格，合共徵召44名球員入伍，分兩隊各自應付2場歐國聯，呢種「車輪戰」既可避免踢殘球員得罪各大球會，亦可盡量考察眾將，無論新兵或舊將都唔敢怠慢，而且早前宣布，今仗會着上1990年復刻版綠色作客波衫，佢哋當年正正着住呢件波衫，喺世盃4強淘汰英格蘭，今仗再着綠衫遇另一宿敵，加上高普激情到爆嘅領軍風格，希望提升球員戰意。按照高普嘅安排，以夏維斯、甘美治為首嗰一隊會出戰頭2場，其中夏維斯今季腳風轉順，攻力有保證。何況兩大新帥急於搶Ｗ立威實鬥攻，今仗隨時合演入球騷。