[东方报]英超：火併紐記般茅勢創驚喜[09-21]

十七号

英超「奇兵」般尼茅夫今晚主場迎戰「喜鵲」紐卡素，般茅演出令人驚喜，自從開鑼戰不敵利物浦後，近3場聯賽全勝，包括擊敗另一支傳統勁旅熱刺，表現愈戰愈勇。反觀紐卡素仍未走出「伊沙克之亂」陰霾，加上上周中歐聯惡鬥完巴塞隆拿，未必回得切氣，今場開平手盤，寧願博以逸待勞嘅般尼茅夫。（Now 621周日晚9時直播）

般尼茅夫今夏出售3位防線主將甸恩胡積臣、米路斯卻基斯同薩巴尼爾，原本前景備受睇淡，但會方勝在識得針對性補充人腳，包括簽入里爾中堅巴科迪迪亞基迪等實而不華新兵，整體實力有增無減。最重要係前鋒安東尼施美安狀態大勇，今季踢4場英超已有3球進帳及2次助攻，包括射入利物浦2球，有力攻陷紐卡素大門。

踢完歐聯體力輸蝕
至於紐卡素因為射手阿歷山大伊沙克「轉會風波」，嚴重影響組軍工作，雖然會方最終賣走呢位瑞典國腳，並簽入德國射手禾達美迪，但新鋒線始終需要時間磨合，難免影響發揮，加上翼鋒安東尼哥頓停賽，攻力再受削。此外，「喜鵲」上場歐聯力戰之下，以1比2輸畀巴塞隆拿，耗力甚大，副選人腳選擇有限，領隊艾迪侯域焗用同一班主力鬥般茅，體力難免比較輸蝕。再睇埋雙方近4次對賽，般茅獲得2勝2和，平手盤撐般茅。