[东方报]國友賽：傷兵成籮 英格蘭試陣細鍊威爾斯[10-09]

十七号

國際熱身賽上演「英倫打吡」，英格蘭主場迎戰威爾斯，兩隊都有世界盃外圍賽後顧之憂，預料今仗純粹「拉筋骨」點到即止，最緊要避免球員受傷，況且「三獅兵團」由杜曹接手執教後，戰術偏向保守，就算贏都係小勝居多，主W太熱冇肉食，參考威爾斯近4場作客有3次總入球開2球或以下，寧願博中位數2.5球嘅入球細。（周五凌晨2時45分開賽）

英格蘭將於下周三凌晨踢世盃外作客拉脫維亞，雖然並唔難踢，但亦唔可以掉以輕心，相信今場熱身賽仍會有所留力，尤其是射手哈利卡尼上場德甲受咗輕傷，為安全起見，未必會派佢上陣。另一位鋒線主力布卡約沙卡剛傷愈冇幾耐，估計亦會踢得比較錫身，以免觸傷舊患，杜曹可能會趁機試用奧尼屈堅斯、查洛保雲等副選前鋒。

進攻中場方面，有傷在身嘅高爾彭馬，同剛復出嘅祖迪比寧咸都冇入選，另外菲爾科頓同基亞利殊亦唔喺大軍名單裡面，難免削弱組織攻勢嘅創造力，「三獅兵團」入波機會隨時大幅下降。

兩隊要留力踢世盃外
至於威爾斯擁有多位效力英超球會嘅球員，包括熱刺翼鋒班倫莊臣、後衞賓戴維斯、富咸中場哈利威爾遜等，即使屬於「英倫細佬」，但整體實力唔會同英格蘭相距太遠，加上彼此熟悉對方踢法，往往會陷入拉鋸局面。值得一提，威爾斯將於下場世盃外生死戰對強敵比利時，今場更加唔會搏盡，甚至可能大條道理派出副選，預料難以對英格蘭防線構成太大威脅，入波唔會多。