[东方报]英超：韋斯咸沉爆喜鵲趁病攞命[11-02]

十七号

至於英超頭場，韋斯咸主場硬撼紐卡素。「錘仔幫」易帥後未見起色，成班波輸到冇晒信心，相反紐卡素近6仗贏咗5場，今仗仲唔趁機打落水狗咩，客勝有計。（Now 621周日晚10時直播）

韋斯咸開咧後表現不濟，近6仗只得1和5負，之前已經炒咗樸達，但新帥紐奴接手後，除咗首度領軍逼和愛華頓1比1外，之後3仗全部輸晒，無論表現抑或戰績都毫無起色。查實「錘仔幫」人腳唔差，不過呢6仗全部都係先失波，落後之下幾乎無還手之力，連戰意都欠奉，令人失望。

禾達美迪弗到漏
另邊廂，紐卡素經歷季初阿歷山大伊沙克罷踢事件，自從送走呢個瘟神後，球隊整體表現漸入佳境，各項賽事近6場豪取5勝1負，包括日前英聯盃輕鬆派熱刺兩蛋晉級。「喜鵲」能夠捱過季初嘅低潮，同新兵禾達美迪極速融入有關，呢位來自德國嘅「2米美斯」已經入咗6球，腳風奇順，配合埋原有嘅積及梅菲、安東尼哥頓同隊長般奴古馬雷斯等，攻力有保證，今仗造訪人見人欺嘅「錘仔幫」，有力反客為主。