[东方报]英超：哥帥千場領軍爭勝 曼城開火射爆利物浦[11-09]

十七号

英超上演「藍紅會」，曼城主場火併利物浦，論狀態無疑係「藍月亮」秤先，各項賽事近7場贏6場，前鋒艾寧夏蘭特入球停不了，加上今仗係領隊哥迪奧拿教波生涯第1,000場比賽，球員肯定會搏盡爭取勝利。至於利物浦近況雖有改善，但聯賽作客3連敗，不宜高估，最好揀曼城主勝。(Now 621及611周一凌晨零時30分直播)

曼城曾於季初演出走樣，但好快重拾勁旅本色，並且愈戰愈勇，近3仗全勝合共轟入10球，包括上場歐聯大炒多蒙特4比1，前鋒艾寧夏蘭特又有波入。呢位挪威國腳着晒火，由8月英超開鑼至今，球會及國家隊各項賽事上陣17場狂入27球，當中只有兩場食白果，可見呢位神鋒一直保持住高水準發揮。

夏蘭特搶破舒利亞紀錄
值得一提，艾寧夏蘭特今季聯賽有13球進帳，累積踢107場入98球，只要今仗入到2球或以上，就可以打破舒利亞最快入英超100球紀錄，呢位英格蘭名宿當年踢124場英超，突破百球大關，隊友應會全力創造機會畀夏蘭特數胡。此外，哥迪奧拿教波生涯999場比賽贏715場，勝出率達71.6%，嚟到「千戰」關鍵時刻，冇理由甩拖，一定會全力爭取勝利。

另邊廂，利物浦繼上輪英超贏阿士東維拉2比0後，上場歐聯小勝皇馬1比0，表現有所起色，但呢兩場勝仗都係主場出擊。睇番「紅軍」近3場英超作客分別不敵水晶宮、車路士、賓福特，今仗造訪大勇嘅曼城，輸波機會更加大。此外，利物浦中場主將賴恩格雲貝治近期受傷患問題困擾，即使上陣亦可能會影響發揮，前鋒艾基迪基表現亦唔及季初搶鏡，「紅軍」無力發圍，曼城主勝捧得過。