[东方报]英超：核心受傷冇力開攻 愛華頓讓波唔怕反[01-26]

十七号

周二凌晨英超獨腳戲，愛華頓主場迎戰列斯聯。愛華頓上輪1比0擊敗維拉，不過佢哋守強於攻，隨住核心人物基亞利殊受傷，「拖肥糖」爭勝力量大受削弱，對住踢法硬淨兼近10場只曾一敗嘅列斯聯，贏面唔高，列斯聯讓球客勝（+1）可作過關變倍器。（Now 621周二凌晨4時直播）

列斯聯近10戰僅1敗
愛華頓喺莫耶斯帶領下，踢法實而不華，面對強敵亦唔會輕易被打敗，但問題係佢哋進攻能力不足，對住同級或較弱球隊要做主攻，往往會束手無策。愛華頓近4場主場只得2和2負，當中包括迎戰新特蘭、狼隊同賓福特都贏唔到波，證明「拖肥糖」唔擅長主攻。

另外，愛華頓嘅攻擊線殘破不堪，兩大進攻創造力泉源，達斯貝利賀爾同基亞利殊先後受傷，球隊攻擊力大打折扣；就連卡路士艾卡拉斯都未踢得，伊利文尼戴耶啱啱踢完非國盃返嚟，狀態成疑，愛華頓入波本錢欠奉，想贏波有一定難度。

列斯聯今場戰意高昂，佢哋最近錄得兩連勝，而且最近10場賽事只係輸過1場，有4勝5和1負成績。列斯聯前鋒卡維特利雲倒戈效力過9年嘅愛華頓，佢今季表現翻生，聯賽已入9球，去到愛華頓主場肯定要踢爭氣波。列斯聯今場有力搶分而回，讓球客勝（+1）用嚟做過關膽一流。