[东方报]英超：熱刺立立亂紅軍速戰速決[03-15]

十七号

今晚另一場英超矚目戰，利物浦主場對熱刺，雙方同樣喺上周中歐聯輸波，但論整體實力及狀態，「紅軍」始終勝一籌，正係反彈好時機；熱刺剛遭遇球隊史上首次各項賽事6連敗，並多達12位主力因傷停問題缺陣，加上近7場有6次上半場落後，睇怕又會極速失守，直取利物浦半場主勝。（Now 621及611周一凌晨零時30分直播）

利物浦主場勁搶韁
利物浦上場歐聯0比1不敵加拉塔沙雷，但整體表現唔算好曳，只係浪費太多入波機會，球員谷埋一肚火，今場爭勝意欲一定更高。事實上單計英超，佢哋近4仗取得3勝1負，加上要力爭下屆歐聯入場券，就算嚟緊周中歐聯再鬥加拉塔沙雷，希望做到速戰速決，以佢哋近7次主場出擊6次領先半場嘅搶韁走勢，實行快手攻破熱刺大門。

熱刺由新帥杜陀執教後4戰全敗，上場歐聯以2比5輸畀馬體會，半場落後1比4，球員戰意全失，更大鑊係人腳嚴重不整，中堅雲迪雲停賽，另一中堅基斯甸羅美路及中場祖奧包連夏上仗相撞受傷，今場有12位球員缺陣，加上盛傳杜陀落鑊在即，內部立立亂，睇唔到翻身可能性。