[东方报]英超：撻着搶分戰意爆升 跟紅頂白利記贏得[03-21]

十七号

周六英超早場，白禮頓主場迎戰利物浦。「紅軍」剛喺歐聯大炒加拉塔沙雷晉級8強，成隊着晒火，回師聯賽有望乘勝追擊，對手白禮頓雖然都唔差，近4場贏3場，不過佢哋近6次對利物浦輸5次，包括上月足總盃淨吞3蛋，今場唔好諗咁多，一於「跟紅頂白」捧客勝。（Now 621及611周六晚8時30分直播）

利物浦上場歐聯回復神勇演出，蘇保斯拉爾、艾基迪基同賴恩格雲貝治入波唔意外，臨尾連穆罕默德沙拿都整番粒埋齋，令呢位埃及前鋒喺歐聯入球達到50球大關，最重要係全隊打番起士氣。「紅軍」打入歐聯8強，下輪賽事喺4月初，可以集中精神喺聯賽搶分，而且踢埋今場就係國際賽檔期，球員可以無後顧之憂，全力爭勝。

現時形勢上，利物浦喺聯賽確實有搶分需要，佢哋以49分排第5，落後第4嘅阿士東維拉2分，亦比第6嘅車路士多1分，歐聯席位之爭相當激烈，「紅軍」場場都要搏殺；反觀白禮頓，現時以40分排12位，並無降班危險，但爭歐洲賽資格又唔輪到佢，足總盃出局後等同提早放暑假，淨係計球員戰意，利物浦明顯高好多。

捧蘇保射破白禮頓
睇番兩隊上月喺足總盃碰頭，利物浦憑居迪斯鍾斯、蘇保斯拉爾同穆罕默德沙拿入波大勝3比0，兩隊咁快又碰頭，預計施洛會用番上次相同打法出擊，再贏機會甚高，熱捧客勝之餘，可以玩埋「任何時間入球球員」，捧近期當銳嘅蘇保斯拉爾，或會有意外驚喜。