[东方报]世界盃：F組亂局激戰連發[06-20]

十七号

世盃「死亡F組」第2輪展開，日本、荷蘭、瑞典3大勁旅勢均力敵，上場都展現出爭晉級嘅實力，今輪荷蘭同瑞典進行「歐洲內戰」，荷蘭力爭敲響勝鼓、瑞典則希望連勝出線；兩虎相鬥，日本亦要全力撲殺突尼西亞，以坐收漁人之利，兩場F組大戰有睇頭！

日本信心爆棚爭突圍
世盃F組第2輪，突尼西亞硬撼日本，雙方都想盡快打開勝利之門。亞洲勁旅日本首仗2比2逼和荷蘭，機動性踢法備受好評，兩度落後都追得和，展示出劣境下作戰嘅頑強鬥志，依家嘅日本已達一線水平，要贏立立亂嘅突尼西亞冇難度，熱捧客勝。（ViuTV 99台、Now 618、616及馬會指定場外投注處周日中午12時直播）

日本近年進步神速，大部分國腳都喺歐洲頂級聯賽搵食，就算決賽周前有三笘薰、遠藤航等主力受傷，上場又有久保建英加入「十字軍」，整體戰力都冇太大影響，堂安律、上田綺世及伊東純也等攻擊球員狀態唔錯，火力有保證。日本喺世盃前打出最強氣勢，領隊森保一嘅用人同戰術都靈活，由熱身賽開始就交出一線水平演出，連挫巴西及英格蘭等世界級勁旅，最近7場賽事拎到6勝1和佳績，球員信心爆棚。日本只要有正常發揮，今場拎3分問題唔大。

臨陣易帥突尼西亞濕滯
突尼西亞係首輪賽事最令人失望球隊之一，面對瑞典災難性慘敗1比5，後防出現大量低級錯誤。事實上，突尼西亞喺決賽周前最後一場熱身賽，亦吞比利時5蛋，最近2場賽事狂失10球，近3仗全敗，領隊林武治喺對瑞典後被極速炒魷，突尼西亞改聘連納特救亡。世盃期間臨時換帥，加上連場大敗，球員信心跌落谷底，捧日本客勝非常穩陣。