[东方报]世界盃：「漫畫對決」青出於藍 日本唔怕巴西[06-29]

十七号

世盃32強焦點之戰上演「漫畫成真」嘅對決，由巴西火併日本。師承「森巴足球」嘅日本青出於藍，已進身一線勁旅行列，並保持各項賽事連續10場不敗，加上淘汰賽一戰定生死，巴西亦唔會冒進，預料法定時間90分鐘難分勝負，既然日本受讓，讓球客勝（+1）值博。（Now 618及616周二凌晨1時直播）

日本上世紀以巴西足球作為學習藍本，最具代表性一定係名宿三浦知良少年時代去巴西受訓，亦因為日本師承「森巴足球」，所以有一段長時期被對方食住，由1999年計起，日本曾連續9次對巴西不勝，錄得2和7負慘淡成績。不過，日本上年10月打破宿命，落後2球劣勢下反勝巴西3比2，對於呢支亞洲一哥而言極具象徵意義，成功擺脫「恐巴症」心理陰影。

事實上，日本大部分國腳效力歐洲球會，講求整體機動性踢法，過往被巴西「格食格」情況已消失。日本上屆世盃分組賽擊敗2支前冠軍得主德國、西班牙，已證明具備同傳統列強抗衡實力，今屆世盃3戰不敗，包括熱身賽在內，日本近10場取得7勝3和，成為一支難以被擊敗嘅強隊。

森巴防線老化易被「放乾」
巴西近2場世盃都大勝3比0，但對手只係弱隊海地同蘇格蘭，「水分」甚重，首場對非洲冠軍摩洛哥，僅逼和1比1，再睇埋今年3月熱身賽輸畀法國，可見巴西遇上較具實力對手，並佔唔到優勢。此外，防線存在老化問題，當中丹尼路雷斯、杜格拉斯山度士、馬昆奴斯哥利亞都超過32歲，遇上反擊速度快嘅日本球員，隨時被「放乾」，應該唔敢壓得太前搶攻，尤其係主帥安察洛堤係意大利人，來到淘汰賽肯定穩陣行先，法定時間讓唔起日本。