[东方报]世界盃：淘汰賽求穩頂得就頂 摩洛哥細最耍加[07-04]

十七号

東道主之一嘅加拿大，16強於美國惡鬥摩洛哥。加軍「假主場」作賽，冇主場之利，球員踢出嚟侵略性減弱，摩洛哥係上屆4強分子，深明踢淘汰賽千祈唔好失波，佢哋近5場4次開2球或以下，2.5球嘅入球細係最佳投注選擇。（Viu TV 99、Now618及616周日凌晨1時直播）

「楓葉國」加拿大3場分組賽都係自己國土出戰，主場球迷吶喊之下，將士用命踢出極具觀賞價值嘅體力型足球，中看又中用，殺入淘汰賽算係預期成績，32強對南非就有少少現形。

加拿大「假主場」侵略性銳減
南非本身實力已經唔算高，加拿大要踢到90+2先至絕殺贏1比0，比賽一路都踢得有啲吃力，直至艾方素戴維斯後備出場，先至令球隊活力增加，可見球隊離開主場之後，冇咗之前3場分組賽嘅主動性及壓逼性，即使今場艾方素戴維斯會正選上陣，相信亦唔會幫得好多。

摩洛哥係上屆世盃4強，今年初捧走非國盃冠軍，舊年奪得世青盃冠軍，2024年亦係奧運銅牌得主，實力非凡，而且老中青各梯隊球員，都具備極豐富淘汰賽經驗。查實摩洛哥上屆世盃3場淘汰賽（唔計季軍戰），全部法定時間都係開2球或以下，球隊深明淘汰賽嘅玩法。

事實上，「亞特拉斯雄獅」上仗同荷蘭激鬥120分鐘，再互射12碼晉級，體力消耗不少，今場好大機會歎慢板，而且球隊踢法一向穩中求勝，近5場4次開2球或以下，淘汰賽更加會步步為營，細盤係不二之選。