[东方报]世界盃：狂牛雄鷹 世盃夢幻對決撐西班牙封王[07-19]

十七号

2026年世盃今晚爆發終極決賽，由西班牙硬撼衞冕之師阿根廷，係史上首次決賽由應屆歐國盃冠軍鬥應屆美洲盃盟主，名副其實係「夢幻決賽」。西班牙近6場法定時間贏晒，表現有餘未盡，相反阿根廷淘汰賽場場贏得驚險，體力輸蝕兼抖少日，要逃脫對手嘅迷宮陣唔易，「狂牛兵團」有力第2度封王，主勝有計。（Viu TV 99、Now 618及616周一凌晨3時直播）

西班牙今屆只有首仗與佛得角互交白卷，之後就漸入佳境，中後場控傳猶如擺下迷宮陣，玩到對手氹氹轉，然後失驚無神拮你一刀，咁樣就締造6連勝，贏得輕鬆兼具說服力。除此之外，今屆只有8強對比利時失過1球，門將烏尼西蒙創下世盃跨屆650分鐘不失球。

阿根廷淘汰賽場場要苦戰
進攻方面，「新世代球王」拉明耶馬作為進攻起點，呢位巴塞神童威脅極大，前鋒線則有5球進帳嘅射手奧耶沙巴爾，及「絕殺之王」米基爾馬連奴接力，上仗4強2比0淘汰法國後，追平意大利保持嘅37場不敗紀錄，今仗贏波將可捧盃兼破紀錄。

相反，阿根廷喺淘汰賽階段就艱辛得多，32強對佛得角藉對方烏龍球加時險勝，16強反勝埃及更爆出黑哨疑雲，8強淘汰瑞士則把握對方1人被逐優勢鬥到加時過關，4強對英格蘭又驚險反勝，進攻則靠晒美斯策動及終結，呢位球王今屆已入8粒，但場場咁樣搏法都咪話唔攰。

阿根廷於淘汰賽中嘅對手，都係領先或追和後刻意死守，先畀「潘帕斯雄鷹」圍攻而久守必失，但西班牙絕對唔踢呢家波，無論領先或落後都會控制大局，以出色嘅整體戰，將美斯嘅威力減到最低，阿根廷要搶主動權唔易，加上佢哋後防唔算穩陣，連場苦戰或加時令體能消耗極大，抖多日嘅西班牙更加着數，料可一搔16年之癢再登上世界之巔，主勝捧得過。