[东方报]世冠盃：皇馬鬥祖記大顯身手[07-01]

十七号

麥巴比復出如虎添翼
世冠盃16強上演2017年歐聯決賽戲碼，皇家馬德里火併祖雲達斯，兩隊今屆大踢悅目進攻足球，加上皇馬射手基利安麥巴比已病愈，準備好復出，令鋒線如虎添翼，「祖記」有前冇後，3戰轟入11球，同時失6球，當正表演賽咁踢。連同聯賽在內，祖雲達斯近4場總入球全開5球或以上，隨時再演入球騷，中位數3.5球大盤值博。（周三凌晨3時開賽）

皇家馬德里6月初由沙比阿朗素執教後，雖然首場世冠盃僅打和希拉爾1比1，但好快就重回正軌，其後2場分組賽分別以3比1擊敗帕丘卡，以及贈薩爾斯堡3蛋，兩仗上半場同樣領先2球，可見「銀河艦隊」踩油發力之下，對手往往難以招架。

首仗射失12碼嘅中場費達歷高華維迪知恥近乎勇，近2場都有波入，加上祖迪比寧咸同雲尼斯奧斯祖利亞輪流發威入波，火力強勁。首席射手基利安麥巴比患腸胃炎缺陣分組賽，幸好已經痊愈復操，今仗有望披甲，進攻人腳更加完整，足以攻陷「祖記」嘅脆弱防線。

祖雲達斯入得又失得
另邊廂，祖雲達斯3月請來名宿杜陀領軍，佢似乎有意改變球隊傳統保守風格，並趁世冠盃試新戰術，先大炒艾阿恩5蛋，再以4比1大勝韋達卡薩白蘭卡，但上仗對曼城，慘敗2比5，可見遇上強隊，防線立即出事。屋漏偏逢連夜雨，後衞尼高路沙禾拿上仗受重傷，可能缺陣2個月，令後防雪上加霜，今場可能前面入埋唔夠後面輸。