[东方报]世冠盃：富明食住個細鍊希拉爾[07-04]

十七号

另一場世冠盃8強戰，富明尼斯硬撼希拉爾。兩隊都係於16強被睇淡下爆冷晉級，令人驚喜，富明尼斯一向防守大過天，希拉爾亦唔敢輕率搶攻，大家鬥小心翼翼唔慌多波入，寧捧2.5球入球細。（周六凌晨3時開賽）

富明尼斯憑住穩健防守，成功突圍而出，今屆4場世冠盃獲得2勝2和，其中3場保持清白之身，包括上場8強爆冷輕取國際米蘭2比0，佢哋無懼讓出控球權，而且打反擊極具效率，贏得好有說服力。連同其他賽事，呢支巴西勁旅近6場僅失2粒，有5次開2球或以下，防線表現固若金湯。

兩軍同樣靠守搵食
另邊廂，希拉爾喺新帥施蒙尼恩沙基帶領下，遇強愈強，今屆4場世冠盃法定時間獲未輸過，除咗分組賽逼和皇馬外，上場8強更爆大冷，加時以4比3淘汰英超班霸曼城，令人跌晒眼鏡。「細恩」本來預計8強會鬥國米，點知富明尼斯將佢舊東家踢出局，相信要重新部署。撇除上場對曼城落後下被迫搶攻，希拉爾踢法都偏重防守，近4場有3次開2球或以下，加上兩軍都打同一家波，亦見識到對手打反擊嘅厲害，一定會踢得小心謹慎，捧細盤更上算。