[东方报]英超：聯賽未開齋維拉難讓富咸[09-28]

十七号

至於英超頭場，阿士東維拉主場硬撼富咸。維拉開咧後聯賽未贏過之餘，射手奧尼屈堅斯陷入球荒，攻力極度疲弱，富咸勝在硬淨唔易輸，讓球主客和仲有得受讓咁筍，讓球客勝（+1）捧得過。（Now 621周日晚9時直播）

阿士東維拉今季風雨飄搖，季前買人已經唔順，開咧後踢咗5輪聯賽，只得3和2負未贏過，而上輪打和新特蘭1比1，先至取得佢哋今季聯賽首個入波。

維拉直至上周中歐霸以1比0擊敗博洛尼亞，各項賽事踢咗7場終於打開勝門，主帥艾美利暫時保住烏紗，不過射手奧尼屈堅斯此役射失12碼，呢位英格蘭國腳踢咗500分鐘都食白果，攻力之差可想而知。

棄將雲集硬淨到暈
相反，富咸喺主帥馬高施華帶領之下，坐擁伊禾比、哈利威爾遜及伊美路維等豪門棄將，踢法實而不華，各項賽事7戰錄得4勝2和僅1敗，防線硬淨到暈。唯一敗仗係8月聯賽輸畀「車仔」0比2，呢場波富咸原本係憑約舒亞京治先開紀錄，可惜因為VAR誤判而取消，其後佢哋承認錯誤已於事無補，富咸輸得冤枉，但表現絕對有保證，今場遇上仍未度過低潮嘅阿士東維拉，有望全身而退。