[东方报]英超：伊戈泰亞高夏蘭特鬥數胡 神鋒大對決[10-05]

十七号

國際賽前英超壓軸戰，賓福特主場迎戰曼城。兩邊都有前鋒近排腳風大順，「蜜蜂仔」有伊戈泰亞高上仗梅開二度，「藍月亮」梗係有英超神射手榜首艾寧夏蘭特壓陣，雙方近季交手都係搏拳居多，2.5球入球大抵玩到爛。（Now 621及611周日晚11時30分直播）

賓福特對傳統「Big 6」特別落力，近5次鬥「Big 6」保持不敗，包括上場聯賽主場鬥曼聯，憑伊戈泰亞高梅開二度，以3比1擊敗曼聯，今場迎戰曼市另一球隊，當然希望乘勝追擊。

事實上，「蜜蜂仔」近3次主場對曼城，勝和負各1場，包括上季落後2球之後追和2比2，完全不落下風。球隊今季踢法亦夠進取，各項賽事8場全部搵到入波，近4場聯賽全開3球或以上，加上雙方近季交手都係搏拳居多，趁住曼城今場有洛迪卡斯簡迪受傷好大機會缺陣，賓福特進攻上可以進一步加強侵略性。

為哥迪奧拿打造里程碑
「藍月亮」曼城啱啱歐聯作客畀摩納哥逼和2比2，入兩球兼攞最佳球員嘅艾寧夏蘭特賽後黑晒面，預料今場佢都會大爆發，希望入多啲波，唔好又畀後面嘔凸出嚟。呢名挪威神鋒今季6場英超入8球，數字冠絕聯賽，而且今場曼城如果贏波，就會係主帥哥迪奧拿上任第250場英超勝仗，眾將肯定會特別落力，相信今場會係入球騷，熱捧2.5球入球大，有興趣嘅朋友，可以試埋3.5球入球大。