[东方报]英聯盃：紐卡素重燃熱血捧主W[10-29]

十七号

另一場英聯盃16強「英超對決」戲碼，紐卡素主場迎戰熱刺，上屆冠軍「喜鵲」狀態回勇，上場英超擊敗富咸，各項賽事近5場贏4場。反觀熱刺備受傷兵問題困擾，頻頻失利，加上雙方近6次正式賽事交鋒，紐卡素取得5勝1負，主勝值得追捧。（無綫myTV SUPER周四凌晨4時直播）

熱刺殘陣３線難兼顧
紐卡素季初因為阿歷山大伊沙克鬧離隊影響軍心，導致成績差劣，幸好近一個月已經走出困境，好大程度上多得新加盟前鋒禾達美迪愈戰愈勇，近6次為「喜鵲」上陣入4球，紐卡素有番一位鋒線重心人物，令進攻更加順暢，連帶安東尼哥頓、哈維班尼斯等中前球員都有出色發揮。由於紐卡素要爭奪英超及歐聯錦標非常困難，應會更注重衞冕英聯盃，相信今仗會全力以赴爭取贏波晉級。

另邊廂，熱刺上場英超擊敗愛華頓，但近6場比賽只有2勝3和1負，能否再贏1場實屬疑問。呢支倫敦球隊最大隱憂係太多傷兵，蘇蘭基、占士麥迪臣、古路施夫斯基、基斯甸羅美路等多位主力養傷，加上熱刺需要英超、歐聯、英聯盃3線作戰，令緊絀人腳百上加斤，更加難以抵擋來勢洶洶嘅紐卡素強攻。兩隊近3次正式賽事碰頭，「喜鵲」獲得全勝，有力再下一城。