[东方报]世盃南美：副選更搏命英格蘭速食塞[11-13]

十七号

已鎖定出線嘅英格蘭，今晚喺歐洲區K組主場鬥塞爾維亞。英格蘭6戰全勝達成目標，領隊杜曹可能作出輪換，不過「三獅兵團」班副選亦有一定實力，加上為鞏固國家隊位置，隨時踢得更落力，難怪主Ｗ熱到燙手。參考佢哋近6場世盃外5次領先上半場，不妨轉玩半場主勝。（周五凌晨3時45開賽）

英格蘭今屆世盃外表現簡直無懈可擊，6戰6勝之餘，合共轟入18球兼未失一粒，包括9月份首循環作客大炒塞爾維亞5比0，上半場已領先2球，可見雙方實力有極大距離。雖然今場對「三獅兵團」嚟講只屬例行公事，但隊內位置競爭激烈，主帥杜曹早前講明冇任何球員係一定入選明年決賽周，各國腳有得上陣自然要交足功課，尤其一眾副選更加要把握機會，比賽態度自然認真。

塞爾維亞焗攻仲危險
另邊廂，塞爾維亞目前6戰3勝1和2負，落後次席阿爾巴尼亞1分，換言之餘下兩輪除咗要贏波之外，亦要寄望阿爾巴尼亞失分，先有望反超前搶到次名附加賽資格，今場焗住豁出去搶攻，分分鐘令防線暴露更多空位，隨時被主隊乘虛而入，早段失守唔會意外。