[东方报]世盃歐洲：意大利戰意存疑 夏神弗爆必撐挪威[11-16]

十七号

世界盃歐洲區外圍賽I組榜首大戰，意大利主場對挪威，由於意大利落後「一哥」挪威3分，兼淨得球少對方17球，今仗必須大勝9球或以上，先至可以反超前，搶走小組首名直接出線席位，可以話係不可能任務。意大利基本上已疊埋心水，等以次名出線踢附加賽，球員戰意成疑，加上挪威神鋒艾寧夏蘭特弗到爆，意軍讓波有暗湧，寧願博7戰全勝嘅挪威讓球客勝（+1）。(周一凌晨3時45分開賽)

雙方6月份首循環交鋒，挪威以3比0擊敗意大利，其後呢支北歐勁旅頻頻大勝，包括大炒摩爾多瓦11比1，上場贏愛沙尼亞4比1，大幅擴大淨得球優勢。

收起東拿利留力附加賽
意大利早已明白難以反超前，日前傳出領隊加度素計劃今仗收起中場大腦辛度東拿利，避免佢再拎黃牌，導致附加賽停賽，可見意軍已呈現留力心態，疊埋心水等踢附加賽。事實上，意大利上場對摩爾多瓦，要踢到88分鐘先至入波打開紀錄，最終僅小勝2比0，想攻入挪威大門，恐怕更加困難。

至於挪威冇必要贏波，但求順順利利出線已經達標，可以專注踢穩守突擊，尤其是鋒線上有大勇嘅艾寧夏蘭特，足以牽制對方防線，估計意大利亦唔敢壓得太前。最關鍵係挪威處於球隊史上巔峰時期，今屆世盃外7戰7勝，共合攻入33球，僅失4球，堪稱攻守兼備，只要保持正常水準，可以坐和望贏，有得受讓抵玩。