[东方报]歐冠：PSG唔齊腳半場細最穩[11-26]

十七号

今晚歐聯另一場焦點戰，上屆盟主巴黎聖日耳門（PSG）主場硬撼熱刺。PSG仍然飽受傷兵困擾，雖然王牌奧士文尼迪比利已好番，但狀態成疑或影響攻力，熱刺遇強例保守，加上吸取歐超盃輸波教訓，造訪PSG務求守住先，初段隨時陷於膠着，1.5球半場細有計。（Now 638周四凌晨4時直播）

PSG頭4輪歐聯獲3勝1負兼狂入14粒，唯一敗仗係輸畀拜仁，睇落仍算對辦。但要留意，主力夏基美及迪斯亞杜伊因傷缺陣，對邊路側擊影響唔細，而且王牌奧士文尼迪比利今季兩度受傷，夾夾埋埋抖咗9場，據報佢已經好番，留晒力預備今仗，不過未必咁快上力，睇番佢今季各項賽事踢咗8場波，只係交出3球同1次助攻，距離佢金球獎得主水平仲差成條街。在傷兵滿營影響下，PSG想好似以往咁，一開波即先發制人都唔易，佢哋近5仗只有2次上半場領先。

熱刺對強隊例龜縮
另邊廂，熱刺喺主帥法蘭克帶領下踢得堅保守，尤其係對親強隊都玩龜縮，雖然效果一般，例如日前鬥阿仙奴慘敗收場，但法蘭克都有佢苦衷。一來占士麥迪臣重傷及沙維西蒙斯未適應，二來喺箭頭蘇蘭基養傷下，陣中冇一位前鋒具支點作用，把心一橫打穩守突擊。

熱刺頭4輪歐聯獲2勝2和未輸過，僅失2粒，呢4仗半場都冇失波，半場全開1球或以下，可見佢哋初段非常重視防守。查實兩軍喺季前歐超盃交過手，以上屆歐霸冠軍身份參賽嘅熱刺，一度領先兩粒下畀PSG追和，最終互射12碼輸埋，今仗再碰頭梗係防守行先，相信半場都係少交收居多。