[东方报]歐冠：受傷老虎矢志振雄風 利物浦撲擊國米[12-09]

十七号

歐聯大戰連場，國際米蘭主場對利物浦係今輪焦點，近期飽受內憂外患困擾嘅「紅軍」，要爭奪前8直接出線資格不容再失，呢隻「受傷老虎」爭勝決心相當明顯；主隊國際米蘭目前穩守第4位，不過今季有「欺善怕惡」趨勢，面對頂級球隊輸波率高，一於撐利物浦反彈開客W。（Now 643周三凌晨4時直播）

利物浦今季戰績大跌，領隊施洛近期改變戰術，不惜將穆罕默德沙拿貶為後備，雖然引爆沙拿「作反」風波，但利物浦變陣後，以德國國腳域斯做核心，進攻流暢度確有好轉，近3場聯賽入6球，拎到1勝2和成績，而域斯喺對抗性冇英超咁激烈嘅歐聯，表現亦明顯更好。

利物浦上輪1比4慘敗燕豪芬腳下，但要留意當時係佢哋信心同士氣最低落時期，近期穩定性已有所提升，而且「紅軍」今季表現最好嘅兩場比賽，就係歐聯5比1炒法蘭克福同1比0贏皇家馬德里，踢歐聯嘅利物浦可以畀到人信心，唔好忘記，利物浦近5次歐聯對意甲球隊，戰績係4勝1負。

國米遇強即屈靠唔住
國際米蘭頭5輪拎到4勝1負，出線形勢相對樂觀，但佢哋上輪1比2輸畀馬德里體育會，就令球迷擔心佢哋踢硬仗嘅能力。國際米蘭今季先後輸畀祖雲達斯、拿玻里同AC米蘭，似乎每逢打硬仗就會輸波，今仗對住「受傷老虎」利物浦，隨時會被咬傷。