[东方报]意甲：國米走樣AC讓主冇黐牙 歐洲激鬥連場[03-08]

十七号

英超休戰之下，歐洲球壇仍然不乏頂流好戲碼，意甲將上演「米蘭打吡」，成為今季冠軍誰屬最關鍵一役。葡超方面，由摩連奴領軍嘅賓菲加急起直追，挑戰榜首波圖，留名睇「寸王」再創奇迹。蘇足盃8強有「老字號打吡」格拉斯哥流浪硬撼些路迪，勢必有激鬥。

意甲矚目大戰，「米蘭打吡」AC米蘭掛名主場惡鬥榜首國際米蘭，第2位AC米蘭落後對手10分，為保持爭標希望，必定搏盡搶分。國際米蘭只要唔輸，已經有着數，爭勝決心唔及A米，加上首席射手拿達路馬天尼斯養傷亦削弱攻力。翻查雙方近6次交鋒，AC米蘭獲得4勝2和不敗，讓球主勝（+1）比較值博。（Now 638周一凌晨3時45分直播）

AC米蘭之所以落後國際米蘭10分，皆因太多和波，今季踢27場聯賽已有9場打和，但如果單計敗仗，其實只輸2場，屬於各隊之中最少。

值得留意，AC米蘭2場敗仗分別輸畀弱隊克雷莫納、帕爾馬，「紅黑軍團」往往遇強愈強，主場對2支前列勁敵拿玻里、羅馬，都順利贏波，聯賽首循環亦以1比0擊敗國際米蘭，更何況呢兩支同市宿敵近6次碰頭，A米獲得4勝2和不敗，往績佔上風，未踢已先贏信心。

拿達路養傷攻力銳減
另邊廂，國際米蘭由2月中旬開始，表現走下坡，各項賽事近5仗僅得2勝1和2負，當中2場勝仗只係贏聯賽護級分子萊切、熱拿亞，遇上較具實力球隊，立即處於下風，包括歐聯附加賽兩回合被挪威球隊波杜基林特「雙殺」，上場意大利盃4強首回合亦只能打和科木0比0。

國際米蘭最大不利因素係射手兼隊長拿達路馬天尼斯養傷，呢位阿根廷國腳今季意甲25次披甲入14球及2次助攻，高居射手榜第1位，佢缺陣之下，國米入波能力勢必打折扣，實在讓唔起AC米蘭。