[东方报]歐霸：森林復仇心切擺大個頭[03-12]

十七号

今晚另一英超代表諾定咸森林，歐霸盃16強首回合主場鬥米迪蘭特。雙方曾於「聯賽階段」交手，當時森林輸2比3，今仗重遇呢支丹麥球隊，梗係想贏波兼報仇，相信會主動出擊，不過佢哋防守欠穩，近3場共失6粒，近5場有4次總入球開3球或以上，一於博中位數2.5球嘅入球大。（Now 643周五凌晨4時直播）

森林上月中搵域陀佩利拉接手領軍後，5場比賽獲1勝1和3負，睇落冇乜起色，但踢法比以往進取，包括上圈歐霸盃附加賽對費倫巴治，兩回合分別贏3比0及輸1比2。代表作一定係上場英超爆冷逼和曼城2比2，今場對住被低一線嘅米迪蘭特，相信會照樣擺大個頭強攻對手，趁地利優勢先下一城，提升晉級機會，否則次回合作客就難踢，巴西前鋒伊戈捷西斯今屆歐霸盃8場入7粒，要攻破客軍大門並唔困難。

米迪蘭特重臨福地唔會縮
米迪蘭特今屆歐霸盃「聯賽階段」8戰取得6勝1和1負，僅次於里昂及阿士東維拉，排第3直入16強，佢哋呢8場都有波入，合共轟入18球，攻力唔講得笑，包括作客以3比2擊敗森林，今仗重臨福地，心理上有優勢唔怕鬥攻，隨時再次合演入球騷。